MakeUp^@^مكيـــاج

 

 

 

 

مرحبا الساع بالنواعم

 

شخباركم ويا المكياج ؟

 

فن المكياج طبعا بحر ماله بداية ونهاية ،،

كل وحدة تبدع بشكل غير ،،

وفيه قواعد أساسية بس ما تعم كل النساء ،،

يعني فيه خيارات وكل وحدة تسوي اللي يناسبها ،،

 

وأنا بخبركم طريقتي واللي ناسبني ،،

بس من البداية بقول إني مو خبيرة مكياج ،،

ولا ماخذة دورات ولا دروس ،،

 

بس أنا أحب المكياج مع إني ما أمارسه باستمرار ،،

بس في المناسبات والزيارات ،،

 

إن شاء الله يكون بلوق مفيد ومميز ،،

 

1- تهيئة الوجه

 

أول شي لازم نهيئ الوجه عن طريق تنظيفه

سواء بواسطة رغوة تنظيف للوجه أو تونيك وقطنة

وبعدها نجفف الوجه ونرطبه باللوشن

وخصوصا البشرة الجافة

ونترياه شوي لين ما يتشرب

 

2- الأساس والبودرة

 

ثاني شي نوزع كريم الأساس على كامل الوجه والرقبة

وفيه أنواع كريم أساس منها السايل

اللي هو أفضل للبشرة الجافة

ومنها الستيك وهو أفضل للبشرة الدهنية

وغيرها من الأنواع والدرجات

طبعا كل وحدة حسب لون بشرتها

أنا أفضل كريم الأساس السايل لأن بشرتي جافة

وأحب آخذ على لون بشرتي بشكل عام

ولازم يكون عندي كريم أساس أغمق شوي

إذا حبيت اللوك البرونزي

وبعد توزيع الكريم أساس نحط البودرة

ومنها نوعين المضغوطة والمنثورة

أنا أفضل المضغوطة وآخذها على لون كريم الأساس

بس على مشمشي

نوزع البودرة على كامل الوجه

وحتى الشفايف ما ننساها

لازم نحط أساس وبودرة عالشفايف

عشان يثبت الروج أكثر

بعدين ننظف الوجه بالفرشاة الكبيرة

لإزالة أي زيادة من البودرة

 

3- رسمة العين والحاجب

هذي رسمة توضيحية لأجزاء العين

 

 

نبدأ برسم الحواجب

سواء بقلم خاص أو شدو بني أو أسود

حسب أذواقكم طبعا وخصوصا للي حواجبهم خفيفة

أما اللي حواجبهم غليظة وما فيها فراغات

فيكفي انهم يمشطونها بمشط الحواجب

أو يمررون عليها الماسكارا الشفافة

لتنظيفها من بقايا البودرة

وممكن نحط لمسة خفيفة من الماسكارا السودة أول

وبعدين نمشطها بالماسكارا الشفافة للتوزيع والتنظيف

انتوا وذوقكم طبعا

وبعد الانتهاء من الحاجب ننتقل للعين

يفضل ان نحط لون فاتح على كامل جفون العين

كأساس لباقي الشدو

عشان يبرز باقي الألوان اللي بنحطها بشكل أفضل

يعني مثلا بيج كامل أو فضي كامل أو وردي فاتح

حسب لون الفستان أو اللي لابسينه

وأقصد على الجفون كاملة يعني الجفن الثابت والمتحرك

وبعدين نحط لون أغمق على الجفن المتحرك بس

نغطيه كامل من الزاوية الأمامية للخلفية

وبعدين نحدد العين من فوق بقلم الكحل الجاف أو السائل

من الزاوية الأمامية للخلفية

بخط ملاصق للرموش العلوية

وتقدرون تسوونه غليظ أو رفيع

وممكن نضبطه بعدين بالشدو الأسود

ونسوي نفس الشي لحدود العين التحتية

أو ممكن نكتفي بكحل داخل العين

وخط رفيع من الشدو الفاتح أو الغامق اللي حطيناه فوق

نرسمه بفرشاه رفيعة تحت الرموش السفلية مباشرة

يبدا من الزاوية الأمامية ويتلاشى قريب الزاوية الخلفية

طبعا العيون لها عدة رسمات تبدعون فيها على كيفكم

بحطلكم مجموعة من الرسمات

 

 

في الصورة رقم 2 بنلاحظ الشدو الفاتح يغطي العين

وعقب رقم 3 شدو أغمق يغطي الجفن المتحرك بس

نقدر نضيف درجة أغمق بعد تغطي نص الجفن المتحرك

وبعدين الشدو الأسود نحدد فيه العين

وندمجه مع الدرجات اللي فوقه

وهذي اسمها الرسمة الدخانية أو السموكي

يبدا بتحديد أسود كثيف حول العين

ويتدرج بألوان أفتح وأفتح للحاجب

 

 

وهذي رسمة غير للعين

تناسب العيون المسطحة نوعا ما اللي مب غايرة

نتبع نفس الخطوات قبل بس ما نكثف الظل الأسود

نكتفي بخط رفيع على حافة الرموش

ونرسم على الحافة الخارجية للعين زاوية بالظل الأسود

ندخلها على حافة الجفن المتحرك

ونكتفي لين نص خط الجفن ونعبيه من داخل

ونقدر ندخل لون عليه في الزاوية الداخلية 

ولا تنسون تحطون لون فاتح أو لمعة سايلة

على عظمة الحاجب يعني تحت الحاجب على طول

عشان يبرز الحاجب وألوان ظل العين

 

 

وهذي رسمات مختلفة

كلها نبدا فيها بنفس البداية

بس بعدين نكمل بالطريقة اللي تعجبنا

حسب شكل العين والألوان وكيف ننسقها

 

 

وهذي رسمات مختلفة لتحديد العين

بالكحل القلم أو بالآي لاينر السايل

طبعا الزوايا تضبط أكثر بالآي لاينر السايل

وكل وحدة وشطارتها عاد

نقدر نخلي الزوايا كلها مسكرة ونمدها على شكل مثلث

أو نفتح زاوية وحدة ونخليها قصيرة أو طويلة

وممكن بنفس استقامة العين أو نمدها لتحت
 

 

أو نقدر نفتح الزاويتين

ونعبيهم بلمعة سايلة أو شدو أو حتى قلم

وممكن نفتح الزاوية الداخلية بس

لكن نخليها واسعة شوي

مثل الصورة رقم 19 ونعبيها بلون

أو نسوي نفس الحركة لكن نكحل العين من داخل

بنفس اللون اللي بنعبي فيه الزاوية

مثل الصورة رقم 20

وتطلع الألوان الفلاش روعة مثل التركواز
 

وآخر لمسة للعين بعد ما نخلص الشدو

هو الماسكارا طبعا

وفيه منها ألوان وأنواع

منها اللي تكثف واللي تطول واللي تقوس

ومنها فيها بلسم مغذي

ومنها الشفافة على شكل جل للتنظيف والتقويس

هذي تنفع للطلعات الخفيفة

ونقدر نعدل العين بالستراس والكريستالات الصغيرة

اللي على شكل ستكرز

أو بعضها يكون معاها صمغ خاص

أو حتى نقدر نرسم اذا كنا رسامين محترفين
 

4- الشفايف

 

رابعا الشفايف نحددها بلون محدد مناسب ويفضل يكون

قريب وايد من لون الروج

ممكن نحدد الشفايف بس بالمحدد وبعدين نعبيها من داخل

بلون الروج اللي نباه ويفضل تداخل الألوان للإبداع

أو نلون بالمحدد الشفايف كاملة

وبعدين نحط عليه لمسات من القلوس

 

5-  البلاشر

 

خامسا نوزع البلاشر أو أحمر الخدود على الخدين

فيه منه ألوان مشمشي وبرونزي ووردي وغيره

نختار اللون حسب المناسب للون الشدو

ونبدأ بابتسامة عشان نبرز عظمتي الخدين

وبعدين نبدا بالفرشاة من العظمة وعلى برا لفوق شوي

يعني الإتجاه كأنه من الأنف إلى الأذن

وبعدين نحط لمسة خفيفة على الجبهة

وأرنبة الأنف والذقن

 

6- اللمسات الأخيرة

 

وآخر شي ننظف تحت العين بالبودرة

اذا كان فيه أي زوايد من الشدو

واذا عندكم مثبت مكياج رشوه على الوجه

وعساكم دوم حلوين من غير مكياج

 

مع حبي

 

أنوسة

 

 

ملاحظة : لا تضحكون على رسمات العيون

لأني رسمتهم بنفسي بالفوتوشوب خخخخخخ

والدرس متعوب عليه فأتمنى ذكر المصدر عند النقل

أتمنى للجميع الاستفادة

 

 

 

 

 

This entry was posted in ⊹⊱ منوعات ⊰⊹. Bookmark the permalink.

6 Responses to MakeUp^@^مكيـــاج

  1. Noisy says:

    تــررم تـــررم
    هااي انووو
    اخبارك يـدووووبه
    استانست من الموضوع ذا <– ياحبها للميك اب
    رووعه رووعه رووعه روعه
    سبيسك ماشاء الله عليك قمه الروووعه
    وواضح مجهوودك فيه
    سلمت يدك
    ويعافيك ربي
    <– تبيك في كلمه راس
    تحيااتي لك

  2. Queen says:

    ههههههههههه
     
    يا سلام عليج نويزي شو هالدخووووووول الأكشني
     
    نورتي السبيس بهالطلة الحلوة
     
    بس شدراج اني دوووووووووبة خخخخخخخخخخخخخ
     
    لا لا أنا رشيييييييييييقة <<<<< طاخ طيخ صوارييييييخ
     
    مرحباااااابج والله دووووووووووووم
     
    <<<< وين تبين كلمة الراس ؟؟؟
     
     

  3. Unknown says:

    ما شاء الله
     
    سبيسج حلو وذوق
     
    يعطيج العافية وفي أنتظار إبداعاتج

  4. Queen says:

    ————
    دمعة ألم
    ————
     
    مشكووووووووورة عالزيارة والكومنت
    والله يعافييييييييييج من كل شر
    مرحبابج دووووووووووم
     
    —————AnastaasiA
     

  5. شٌٍيٍخٍُة الٍُشٍُيخِاٌتٍ says:

    اهئ اهئ
    <<<< مقهوره ماتعرف تحط  مكياج
    كله تسويه لي اختي
     وربي قهر شو كثر احبه بس ماعرف اسويه بنفسي
    اذا سويته تاكدي بطلع كشخه كاني  ورقه رسم لطفل صغير
    ياكثر الخرائط وياكثر الالوان
    اعرف احط بس كحل وبعد كحل عادي مو رسمه
    على العموم فديتج وفديت موضوعك الحلو
    واتمنى منك زيارة سبيسي
    توه جديد
    وينتظر منج تعليقاتك عليه
    تحياتي

  6. Queen says:

    حيا الله
     
    شيخة الشيخات
     
    نورتي السبيس بطلتج الحلوة
     
    عاد شيخة الشيخات ما تعرف تحط مكياج ؟؟؟
    لا  لا  ما أصدق 00 أكيد انتي مواضعة بس
     
    عالعموم عسى الموضوع فادج ولو شوي
    وان شاء الله السبيس كله عيبج
     
    شرفينا دوووووووووووووووم
     
    ——————–AnastaasiA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s